Anti-terror law diktadoriya: KMU

Ang Kilusang Mayo Uno (KMU) sa tungatungang Kabisay-an mihulagway sa bag-ong anti-terror law nga usa ka matang sa diktadoriya nga gipatuman sa kagamhanan ni Pres. Gloria Arroyo.

Si Wenie Badayos, chairman sa KMU-Central Visayas mihulagway nga usa ka “undeclared martial law” ang pagpatuman sa Human Security Act sugod karong Domingo.

Nunot niini, matud pa ni Badayos nga nagpadayon na karon ang ilang gihimong countdown nga protesta batok sa maong balaod nga himuon lukop nasud gumikan kay para kanila harassment na kini.

Matud pa niya nga mosamot pa unya ang pagpamatay sa lider sa mga militante  ug progresibong pundok subay sa maong balaod.

Sa wala pa maduso ang balaod, sumala pa ni Badayos, kapin na sa 800 ka mga extra-judicial killing ang nahitabo sa nasud.

Apan bisan pa man niini, gitataw ni Badayos nga wala makahatag og hulga kanila ang bag-ong balaod batok sa terorismo ug dili kini makapahunong sa mga krusada pagpadayag sa ilang sentimento batok sa gobyerno.