Mga residente sa Dumlog gipahimangnoan

Kapitan sa  Dumlog, sa Talisay Charles Basillote miawhag sa mga residente sa iyang barangay nga nagpuyo  daplin sa baybayon nga magbantay-bantay kay basin og masubli na usab ang nahitabo sa milabay'ng tuig nga sobra sa 100 ka balay ang giguba ug gianod sa dagkong bawod.

Niining pag-abot sa hangin nga habagat ug dili maayong tempo mabantayan nga dagko na kaayo ang bawod diha sa dagat.

Gibutyag kagahapon sa buntag ni Basillote sa Banat News nga adunay mga residente diha sa iyang barangay nga nagpuyo sa daplin sa baybayon nga nagdumili sa pagbiya sa ilang lugar sa rason nga naa sa dagat ang ilang panginabuhian.

Apan dunay uban usab ang napugos sa pagbiya paglikay   sa disgrasya.

Matud ni Basillote nga sa milabay'ng tuig dihang gibanlas sa bawod ang kabalayan diha sa Sitio Litmon aduna pa gihapoy mga pamilya ang nagdumili sa pagbiya sa kahadlok nga ang ilang mga gamit pangawaton bisan gihangyo na kini sa kagamhanan sa siyudad nga pabiyaon.