Usa ka mag-uuma gidunggab patay sa iyang kaugalingon igsoon nga nahitabo sa sitio Tagbilas, Daan Paz, Poro, Camotes sa miaging adlaw.
Ang biktima giila nga si Celso Mercadal, 46, minyo, usa ka mag-uuma samtang ang suspetsado giila nga si Laberto Mercadal, 36 anyos ang panuigon, minyo usa usab ka mag-uuma sa maong dapit.
Sa inisyal nga imbestigasyon nga gihimo sa kapolisan sa Poro, gideretso og dunggab sa suspetsado ang biktima sa tiyan niini sa walay igong rason ginamit ang usa ka hunting knife.
Matud pa sa kapolisan nga gidali pagdala sa Don Ricardo Maningo District Hospital sa lungsod sa San Francisco ang biktima apan sa paghiabot sa maong tambalanan gideklarar kini nga dead on arrival sa mananambal.
Si Kapitan Emeterio Florentino sa maong barangay inubanan sa mga barangay tanod diin nahitabo ang insidente mao na ang misikop sa suspetsado ug gi-turnover ngadto sa mga sakop sa kapolisan nga miresponde sa maong alarma
Si PO1 Patrick Mangubat nga gikahinabi sa Banat News nagkanayon nga igo ra nga miuwang ang biktima tali sa away sa usa niini ka igsuon ug sa suspetsado.
Wala tuyoa nga ang biktima maoy naigo sa pagpanunggab sa suspetsado gani matod pa sa dihang miulbo ang away tali sa duha ka managsuon naka-inom ang suspetsado.
Midugang si PO1 Mangubat nga mopasaka gyud og kaso ang pamilya sa biktima ngadto sa suspetsado ug karong adlawa eskortan sa kapolisan ang suspetsado paingon dinhi sa dakbayan sa Sugbu aron isang-at ang kasong murder.