Pamilya sa postmaster nangayo’g panabang ni Bro. Soc

Pamilya sa postmaster nga gipusil niadtong Martes sa buntag nabalaka nga tiwasan ang biktima hinungdan nga mihangyo kini ngadto ni Mayor Socrates Fernandez nga pabutangan og polis ang nahimutangan niining hospital.

Si PO2 Leandro Azarcon, duty desk officer sa kapolisan sa Talisay mibutyag kagahapon sa buntag sa Banat News nga niadtong Martes sa hapon mitawag ang anak ni  Postmaster Edwin Genebraldo ngadto ni Fernandez diin mihangyo  nga pabutangan og polis ang nahimutangan nga hospital sa iyang amahan kay basin og tiwasan unya kini sa suspetsado.

Matud ni Azarcon nga ang anak ni Genebraldo mibutyag nga anaa pa karon sa talandugon nga kahimtang ang iyang amahan  sulod sa Intensive Care Unit (ICU).

Si Azarcon mibutyag nga ang iyang mga kauban padayon pa sa pagpahigayon og follow-up sa imbestigasyon sa maong insidente aron masakpan ang suspetsado.

Kahinumduman nga si Genebraldo gipusil  atubangan sa iyang balay sa  Lawaan III mga alas 7:15 sa buntag niadtong Martes sa dihang gikan kini naghatod sa iyang anak sa Talisay City Central School sa Poblacion.

Ang suspetsado daling miikyas human sa maong hitabo.

Kahinumduman usab nga usa sa anggulo nga gilantaw karon sa mga polis mao nga si Genebraldo maoy nabuthan sa kasuko sa suspetsado tungod kay wala madawat niini ang iyang package gikan sa iyang asawa.

Ang suspetsado nangutana pa kini ug nakig-estorya ni Genebraldo kung asa makuha ang package nga gipadala sa iyang asawa sa wala pa mahitabo ang pagpamusil.