Postmaster sa Talisay gipusil, kritikal

Kritikal ang kahimtang sa postmaster sa  Tabunok, Talisay human  pusila sa wala mailhing lalaki kagahapon  sa alas 7:15 sa buntag diha mismo sa atubangan sa balay sa biktima sa   Lawaan III sa nahisgutang siyudad.

Ang biktima giila sa mga polis nga si Edwin Genebraldo,  nakaangkon og  samad pinusilan sa walang bahin sa tampihak ug ang bala milahos sa tuong bahin sa kilid sa iyang liog ug  daling gidala sa iyang silingan nga si Roberto Cañada diha sa South General Hospital sa  Naga.

Ang grupo sa Homicide Section ug alert team sa kapolisan sa dakbayan sa Talisay nga si  Insp. Leoncio Baligwat, SPO1 Pablito Zuelo, PO3 Edwin Alvarado, PO1 Alan Villazurda, SPO1 Ricardo Viacruzis, PO3 Arnold Damasco, PO2 Eric Enad ug PO2 Joel Rosales  miresponde sa maong insidente.

Si Enad sa pakighinabi kagahapon sa buntag sa Banat News mibutyag nga si Genebraldo kinsa nagsakay og motorsiklo gikan naghatod sa iyang anak diha sa Talisay Central School sa  Poblacion ug pag-abot niini diha sa ilang balay kalit lang mitungha ang usa ka lalaki nga  nagsakay   og motorsiklo nga pula nga XRM nga nagtangag sa plakang 6465 walay mga prefix o litra.

Matud ni Enad nga ang nahisgutang lalaki nangutana ngadto ni Genebraldo kun asa makuha ang gipadalang package sa iyang asawa diin gitubag kini sa biktima nga adto ipasusi sa City Hall tungod kay ang City Hall Post Office maoy mo-release sa mga package.

Gawas sa maong pangutana ang suspetsado padayon gihapon nga nakighinabi ni Genebraldo hinungdan nga giisa sa biktima ang shade niini sa iyang helmet apan kalit lang kining gidul-itan  og pusil sa suspetsado.

Si Enad nagkanayon nga ang suspetsado kinsa daling mibiya sa lugar nga nahitaboan nagsul-ob kini og helmet, sun glasses ug maong nga jacket.

Ang kapolisan sa siyudad naglantaw sa anggulo karon nga si Genebraldo maoy nabuthan sa kasuko sa suspetsado tungod kay wala niini madawat ang package gikan sa iyang asawa.