Australiyano nakapatay sa pangasaw-Onon

Australiyanong nagduwa-duwa sa usa ka pistola nakapatay sa iyang pangasaw-onon human aksidenteng mibuto ang armas diha sa walang bahin sa dughan niini diha sa ilang lawak sa giabangang apartment.

Ang insidente nahitabo diha sa Kevin’s Apartment Door 3 diha sa dalan Justice Street sa Peace Valley sa barangay Lahug niadtong Lunes sa gabii.

Ang namatay giilang si Trishia Jocec Baisac, 30, usa ka negosyante ug residente sa maong dapit samtang giila ang iyang fiancee nga langyaw nga si Paul Anton Smith,32, usa ka magtutudlo og pinulungang English sa usa ka tunghaan sa Sydney Australia.

Ang biktima dali untang gidala ni Smith sa Chong Hua Hospital apan gideklarar kining dead on arrival, malinawon hinuon siyang mitahan ngadto nila ni PO3 Rogelio Nedamo, PO3 Audie Pelayo, PO3 Henry Estoy sa Homicide Section.

Sa imbesigastion sa Homicide Section, gikatahong diha ang duha sa ilang lawak ug nagkomedyahay ug si Smith nagpunay og duwa-duwa sa 9 millimeter Glock pistol sa biktima.

Apan wala damha kalit kining mibuto diha sa atubangan sa babaye ug naigo kini sa walang bahin sa dughan. Si Smith daling nidagan sa silong ug nangayo og tabang sa ilang mga katabang nga sila si Ferry Jun Estac ug Faustino Atienza, Jr. ug gidala sa tambalanan ang biktima.

Sa gihimong crime scene investigation ni PO3 Ronald Manolong sa scene of the crime operation (SOCO) nakuha diha sa lawak sa magtiayon ang Glock pistol nga giduwaan ni Smith, duha ka magazine nga puno og bala, usa ka basiyo sa 9 millimeter, usa ka kutsilyo, usa ka sinina nga dunay lama sa dugo.

Dugang gidala sa kapolisan ang daghang mga relos de pulso nga mga Rolex nga gisulod sa karton, gikatahong mga baligya kini sa duha.

Si Smith dihang gihinabi sa Banat News nagkanayon nga aksidente gyud ang nahitabo ug masulub-on siya sa gidangatan sa iyang pangasaw-unon.

Ang duha gikatakdang magpakasal na sa sunod buwan ug plano na unta nilang magsugod og hikay sa ilang mga papeles sa sunod semana, gani si Baisac nidala na sa apelyedo ni Smith sa iyang mga papeles.

Si Smith midugang nga usa ka tuig ug tunga na silang manag-uyab ni Baisac ug magbalik-balik lang siya dinhi sa nasud aron kini bisitahon.

Si PO3 Estoy nagkanayon nga dunay lisensya ang armas ug naa kini sa pangalan sa namatay.

Gipaninguha pa sa kapolisan nga mapahibalo ang mga ginikanan sa biktima sanglit gikatahong wala nakahibalo si Smith kung taga asa gyud si Baisac.

Ang Homicide Section mipasaka og kasong Homicide batok kang Smith kagahapon.