Patay ang usa ka lalaki nga dunay deperensiya sa pangisip human kini luba-a og mahait nga hinagiban sa iyang silingan dihang mitumaw ang panaglalis niadtong Domingo sa hapon diha sa Sitio Bungtud, Casay, Dalaguete.
Ang biktima giila nga mao si Tirso Amamangpang, 33, ug residente sa Sitio Angas sa samang barangay. Samtang ang gitumbok nga midunggab sa biktima giilang si Charles Legaspi, 43.
Ang suspek nadakpan human sa hitabo nila ni PO3 Clito Pia ug PO1 Allan Sanoy kinsa maoy nitubag sa hitabo.
Matud ni PO2 Peter Isidro nga nahinabi sa Banat News sa wala pa mahitabo ang pagpanunggab nianang buntag sa Domingo ang payag sa suspek giguba sa biktima.
Pagkahapon nag-abot ang biktima ug ang suspek hangtod mitumaw ang ilang panaglalis nga misangko hinuon sa pagpanunggab.
Ang biktima naigo sa ubos nga bahin sa tiyan nga maoy nakaingon sa hinanali niining kamatayon.
Matud ni PO2 Isidro nga badlungon gyud ang biktima sa maong dapit sanglit kadaghan sila makadawat og reklamo kabahin sa pagpanghasi ug pagsabasaba gani dunay higayon nga mosulod sa balay ug ipangyabo ang sulod sa kaha ug kaldero.