Walay nalapas nga balaod ang konseho sa dakbayan sa Mandaue labot ning ilang lakang pag-awhag kang Mayor Jonas Cortes nga makig-coordinate sa konseho labot sa mga polisiya pagpanguha og bag-ong empleyado sa dakbayan.
Kini maoy giklaro ni Bise Mayor Carlos Pontico Fortuna human usab si Mandaue City Administrator Briccio Boholst miingon nga encroachment sa executive branch ang gihimo sa konseho sa ilang dakbayan sa pagpanghilabot sa gahum sa mayor.
Matud pa ni Fortuna nga wala sila mo-encroach sa gahum sa mayor kun dili igo lang nilang gi-exercise ang katungod sa konseho diin ubos sa Local Government Code gihatagan og katungod ang konseho paghimo og polisiya sa pagpanguha og mga bag-ong empleyado.
Iyang giklaro nga ang nakalatid sa balaod nga adunay mga kondisyon niini diin ang mayor igo lang sa pag-implimentar sa mga polisiya.
Subay niini, iyang giklaro nga ang maong praktis nga ang mayor magbuot niadtong unang administrasyon pa kini gihimo ug nadala lang usab sa bag-ong pamunoan.
Iyang giklaro nga sa pagkakaron ila na gyud nga gamiton ang ilang gahum dili sama niadto nga wala magamit gumikan kay silang tanan kaalyado man usab sa mayor.