Polis nga nangilkil namusil sa iyang biktima nga babaye apan walay suwerte tungod kay nasikop kini human madisgrasya atol sa iyang pagsibat didto sa Sitio Humayhumay, Gun-ob, Lapulapu kagahapon sa kaadlawon.
Ang biktima nagpaila nga si Beatriz Luriosa, 46, nga nanimuyo sa naasoy’ng lugar.
Sa imbestigasyon ni PO3 Frederick Eslit sa Homicide Section sa Lapulapu, nasayran nga si Luriosa nagtukaw ala una sa kaadlawon kagahapon sa iyang tugkaran sa dihang giduol sa usa ka tawo nga nagpailang usa ka polis ug nangayo kaniya og kuwarta tungod sa nagpadayong sugal nga hantak sa maong lugar.
Human mibalibad si Luriosa, kalit niyang nabati ang sipa nga buto ug naminhod sa kasakit ang iyang walang bukton nga naigo diay sa bala sa armas. Gidala siya sa Mactan Doctor’s Hospital, samtang ang nagpailang polis dali nga misibat.
Pipila ka gutlo, may polis nga naila sa ngalang si PO2 Dante Villacarlos ang nadisgrasya sa iyang gimanehong motorsiklo sa unang taytayan sa Mandaue ug Lapulapu, hinungdan nga nasuta nga kini diay maoy nangilkil ug namusil ni Luriosa.
Ang ligid sa motorsiklo ni PO2 Villacarlos nasangit sa island sa karsada tungod sa iyang pagdalidali hinungdan sa iyang pagkadisgrasya.
Si PO2 Villacarlos gidala sa Mactan Doctor’s Hospital ug gipaatubang kang Luriosa kinsa positibong mitumbok sa maong polis nga maoy nangilkil ug mipusil kaniya.
Ipaubos si PO2 Villacarlos sa paraffin test.