Pugante sikop og balik sa MPG

Usa ka pugante sa Bureau of Jail Management and Penology ang nadakpan pagbalik sa mga sakop sa Mobile Patrol Group kagahapon sa buntag diha sa sitio Sambag 2 sa Banawa, Barangay Guadalupe ning dakbayan.

Ang nadakpan pagbalik giilang si Jeslie Labra,18, nga taga barangay Guadalupe kinsa gikatahong mieskapo sa iyang mga bantay nga sakop sa BJMP samtang siya na-confine sa Cebu City Medical Center niadtong Pebrero 10, 2006.

Matud pang Sr. Supt. Patrocinio Comendador dunay kasong frustrated homicide si Labra kaniadto apan nakakita kini og higayon sa pag-eskapo dihang nalandig siya sa tambalanan.

Ang Mobile Patrol Group nakadawat og impormasyon kalabot sa presensya sa suspek diha sa nahisgutang lugar ug daling gisusi nila ni PO1 Edcel Peticio, PO1 Richard Condes ug igsuon niini nga si PO1 Orland Condes nga nagbansay pa sa Field Training Program .

Matud pang Comendador hatagan og pasidungog ang maong mga polis ug personal niya silang bisitahon sa ilang buhatan aron pasalamatan.

Dugang pa ni Comendador nga angayan lang nga silutan ang mga nagpabadlong nga mga sakop ug ingon man makatarunganon usab nga pasidunggan ang mga sakop nga dunay maayong gawi.