Si Kongresista Antonio Cuenco miingon nga nakigtagbo siya kagahapong adlawa ni Kongresista Roque Ablan sa Laog, Ilocos Norte kinsa maoy tsirman sa Committee on Dangerous Drugs sa Ubos Balay Balauranan alang sa ilang lakang nga pakigkitaan og balik si Joseph Yu, usa sa mga akusado sa shabu mega-laboratory sa Mandaue.
Matud pa ni Cuenco nga kini maoy gihangyo ni Ablan subay usab sa hingpit na nga pagka-state witness ni Simon Lao batok kang Calvin Tan nga maoy pinanser sa maong laboratoryo.
Si Cuenco mipasabot nga kini maoy ikatulong higayon nga ilang hangyuon si Yu pagbutyag kinsa ang mga lokal nga kontak dinhi sa Sugbu sa maong sindikato.
Sumala pa niini nga iyang gipahibalo si Ablan nga karong semanaha personal nilang balikan sa pagpakigkita si Yu labot sa maong isyu.
Iyang giklaro nga dili nila lung-an sa pagbalik-balik og hangyo si Yu aron mosulti kini kun si kinsa ang lokal nga kontak niini sa pagtukod sa mega shabu laboratory gumikan kay dili mamahimo nga magsige lang sila og hupot sa mga ebidensya nga pagduda lang sa mga lokal nga kontak.
Matud pa niini nga gihimo usab niya ang maong lakang nga paanhion og balik si Ablan aron hangyuon si Yu gumikan kay iyang nakita nga nagkulang ang National Bureau of Investigation sa paninguha nga makumbinser si Yu sa pagtug-an sa lokal nga kontak.
Matud pa niini gi-triple unta sa NBI ingon man sa PDEA ang ilang lakang sa pagkumbinser kang Yu aron mahatagan na og katin-awan ang mga naglimin nga isyu sa maong drug laboratory.
Samtang subay usab niini iyang gibasol si Atty. Noel Archival kinsa maoy abogado ni Yu nga maoy nakaingon kun nganong wala na kini mohinayon sa pagbutyag sa mga nalambigit.
Matud pa sa kongresista nga motug-an na unta kaniadto si Yu apan sa paghupot ni Archival sa kaso niini wala na tugoti ang iyang kliyente nga mohimo sa maong katuyoan.
Nanghinaot siya nga si Yu molantaw unta niini og mamahimong iyang ilisan ang iyang abogado nga mao na hinuoy mibabag sa pagbutyag niini.