Newsboy gipareglahan sa Bloods

Usa ka newsboy ang gipareglahan ug gipusil sa mga gidudahang sakop sa Bloods gang diha sa dalan T.Villa sa barangay T.Padilla ning dakbayan kagahapon sa udto.

Ang gipusil giilang si Lucio Capoy, 20, residente sa dalan Sikatuna sa barangay Zapatera ning dakbayan kinsa nakaangkon og usa ka samad pinusilan diha sa iyang walang bukton ug tapsing sa bala diha sa likod.

Matud pang PO2 Julius Mabunay, sa Homicide Section sa pakighinabi sa Banat News gikan pa nangolekta ang biktima sa iyang gideliberan og mga newspaper dihang pag-abot sa maong dapit nasugatan ang grupo sa mga suspek.

Usa sa mga suspek giila sa biktima nga si Acean Pukdol uban sa tulo pa ka mga wala mailhing mga lalaki nga pulos gituuhang mga sakop sa Bloods Gang.

Matud pa ni Mabunay miyango pa si Pukdol sa biktima dihang sila nagsugat maong wala magduda ang biktima nga dunay dautang tuyo kaniya ang grupo.

Diha nalang siya nakugang dihang kalit nga gipusil sa mga suspek tulo ka higayon diin naigo siya sa iyang walang bukton ug likod hinungdan nga mipasutoy siya og padagan sa iyang bike hangtud sa outpost sa mga barangay tanod sa dalan T.Padilla ug nagpatabang.

Matud pang Mabunay, dili sakop ang biktima sa Crips apan posibleng naalaan lang kini sanglit gikatahong sagad sa mga barkada sa biktima miyembro sa Crips Gang.