Nabulit og samad dinunggaban

Usa ka  katabang sa panimalay nga misuroy sa miaging Domingo sa hapon sa Lower Tabok,  Mandaue miuli sa miaging gabii nga nabulit sa dinunggaban ang kalawasan ug namatay.

Ang biktima mao si Hertrodez Abyog, 41, dalaga nga lumad nga taga San Francisco, Talibon, Bohol ug dugay na nga katabang ni Marigold Russel, hingkod ang panuigon, minyo ug nagpuyo sa maong dapit.

Si PO2  Melvin Pelayo sa kapolisan sa Presinto 3 sa Basak Police Station nga gikahinabi sa Banat News miingon nga nagkadugo si Abyog nga mipauli sa panimalay sa iyang agalon.

Ang agalon sa biktima nga si Marigold Russel kinsa maoy nag-abli sa pultahan gibati og kahingangha sa kahimtang sa biktima nga nagkadugo ang kalawasan.

Dali nga gidala ang biktima sa Cortes General Hospital sa maong dakbayan apan gideklarar kini sa mga doktor nga  patay na nga nahidangat sa maong tambalan.

Si PO2 Pelayo miingon nga walay nakakita sa dihang gidunggab ang biktima sa mahait nga kutsilyo nga nakaingon sa kamatayon niini.

Matud pa ni Pelayo nga ilang gituohan nga naglakaw lang ang biktima pauli sa panimalay sa iyang agalon dihang kalit lang gisugat sa pagdunggab.