Duha ka motor ‘bangga;1 patay

Usa ang patay samtang laing duha ang naa sa talandugon nga kahimtang human magkabangga ang duha ka motorsiklo nga gisakyan niini nga nahitabo didto sa Poblacion West,   Moalboal kagahapon sa gabii.

Ang namatay giila nga si Gregorio Licaros samtang ang duha ka nangaangol mao sila si Arnel Deniega uban sa backrider nga si Joel Deniega nga pulos nalandig sa tambalanan.

Si PO2 Emerito Sansan nga gikahinabi sa Banat News miingon nga pulos nagmaneho og motorsiklo nga walay suga ang lubot niini sa dihang nagkabangga ang duha ka sakyanan.

Matud pa ni PO2 Sansan nga padulong sa Poblacion sila si Arnel ug Joel Deniega sa dihang nahitabo ang aksidente samtang si Gregorio padulong usab sa Basdiot pipila ka kilometros gikan sa Poblacion.

Matud pa ni Sansan nga maayong pagkalagpot sa duha ka biktima nga sila si Arnel ug Joel Deniega sa ilang motorsiklo sa dihang mibangga sa motorsiklo ni Gregorio nga usa ka Honda XRM kolor red nga may plate number GI-8295.

Midugang si Sansan nga sa dihang miresponde sila sa alarma nakita nila ang biktima nga si Gregorio Licaros nga nagbuy-od tapad sa iyang motorsiklo nga walay kinabuhi.

Ang tulo ka biktima gidali sa pagdala sa Badian District Hospital apan gideklarar nga dead on arrival si Licaros nga maoy nagrabehan sa maong insidente ug pipila ka minutos ang duha ka biktima nga sila si Arnel ug Joel gibalhin sa usa ka ospital dinhi sa dakbayan sa Sugbu aron maatiman kini sa mga doktor.