P126 mil nga mga alahas nada sa tulisan

Mikabat sa P126 mil ang kantidad sa mga alahas ug butang nga nadala sa mga kawatan niadtong Sabado sa gabii gikan sa duha ka residente sa lungsod sa Minglanilla.

Ang mga biktima mao sila si Arnel Joyohoy 40-anyos nagpuyo diha sa Block 7, lot 9 Villa Felliza, Barangay Tungkil ug Merly Bartolaba 40, nagpuyo diha sa Phase I, Block 15, Spring Wood Village, Barangay Tulay sa maong lungsod.

Si SPO1 Renato Masangkay polis sa lungsod mibutyag kagahapon sa Banat News nga atol nga wala diha sa ilang mga balay sila si Joyohoy ug Bartolaba hinungdan nga nakahigayon og pagpanglungkab ang mga wala mailhing kawatan.

Nadala sa suspetsado gikan ni Joyohoy ang usa ka lisensiyadong Taurus magnum kalibre .357 nga revolver nga nagkantidad og P29 mil, usa ka laptop unit nga nagkantidad og P45 mil ug Italian jewelry nga mikabat sa P8 mil ang kantidad.

Si Bartolaba nawagtangan usab og motorola nga cellphone nagkantidad og P4 mil, nokia 3210 nagkantidad og P3 mil, salapi nga P6 mil, usa ka parisan sa ariyos P20 mil, duha ka bracelet P5 mil, usa ka kwentas P4 mil ug usa ka sing-sing P 2 mil.

Ang mga kawatan miguba sa mga door lock sa likod nga bahin sa  mga pultahan sa balay nila ni Bartolaba ug Joyohoy.