300 ka mga bata sa Mandaue, Lapu gipangtuli sa PAF

Dul-an sa 300 ka kabataan sa dakbayan sa Mandaue ug Lapulapu ang nakapahimulos sa “Operation Tuli” nga bag-ohay lang gipahigayun sa Philippine Airforce – Tactical Operations Command (PAF-TOC).

Ang kabataan nagagikan sa parokya sa Gethsemani sa barangay Casuntingan,   Mandaue ug tulo ka barangay sa dakbayan sa Lapulapu.

Ang kalihukan gipahigayun sa Gethsemani Parish Social Hall ug sa Mactan Benito Ebuen Air Base nga gipasiugdahan sa Gethsemani Parish Pastoral Council sa pagpakigtambayayong sa Association of Government Information Officers ug Philippine Information Agency sa rehiyon 7.

Ang mga tambal sa “Operation Tuli” gihatag sa Parish Pastoral Council ug sa mga lokal nga opisyal.

Ang mga tinun-an sa Benedicto College of Nursing niabag usab sa kalihukan isip kabahin sa community outreach program.

Gawas sa pagpanuli, ang barangay Humay-humay, Pajo ug Pusok sa dakbayan sa Lapulapu ang nakapahimulos usab sa Free Medical-Dental ug Legal Services nga gihatag sa PAF-TOC ug AGIO-7.

Ang Department of Health ug ang Fairchild Semiconductor Company ang niayuda usab sa mga tambal ug medisina sa “Operation Tuli.”

Ang duha ka kalihukan giisip nga pagpalig-on sa relasyon tali sa militar ug mga sibilyan sa dakbayan sa Mandaue ug Lapulapu pinaagi sa community outreach services