Langaw mahimong mopatay sa kabayo

Dili lang ang mga tawo maoy namilegro sa langaw dinhi sa Sugbu kun dili hasta na ang mga kabayo sa dakbayan.

Kini tungod sa makamatay nga sakit nga mugna sa sinusupsopan sa langaw nga gitawag og Equine Infectious Anemia.

Matud nI Cty Veterinarian Alice Utlang nga wala pay tambal ang nahisgutang sakit hinungdan nga namilegro niini ang mga kabayo.

Nabalaka si Utlang nga moabot dinhi sa siyudad ang maong sakit human masayod nga positibo sa “cogin’s test” ang usa sa mga kabayo sa usa ka breeder’s association sa Sugbu.

Subay niini, gitambagan ni Utlang ang mga tag-iya og kabayo sa angayan nilang buhaton kung mataptan sa Equine Infectious Anemia ang ilang binuhi.

“Ang kanang na-infected, muskitiruhan aron way makasulod nga langaw kay kanang sakita, mora man na og aids, way tamabl, kung lower ug resistance ang kabayo, dali ning mamatay, apan kung maayo pa ang resistensiya, mamahimo gyud nang carrier”, sumala pa ni Utlang.

Duna hinuoy mas dali nga sulosyon sa nahisgutang sakit aron kini seguradong dili makatakod sa ubang kabayo.

Matud ni Utlang nga mas maayong ihawon na lang ang kabayo nga mataptan sa Equine Infectious Anemia.

Sumala pa ni Utlang nga dili mausik ang karne sa kabayo nga mataptan sa nahisgutang sakit tungod kay mahimo kining kan-on sa tawo.

Giklaro sa city veterinarian nga base sa meat inspection law dili makatakod ang Equine Infectoius Anemia sa tawo kun dili ngadto lang sa isig ka kabayo.