Naukay ang mga residente sa dalan Magallanes duol sa Forbes Bridge nga nagkonektar sa Magallanes ug dalan Tupas sa dihang usa ka gituohang bomba ang miulbo kagahapon sa kaadlawon apan nasayran nga ordinaryo ra kining pabuto nga giusa og bugkos sumala pa sa kapolisan.
Duha ka mga pabuto nga gikatahong gisulod sa plastik ug gibilin sa maong dapit duol sa balay ni Brix Lim ug ang usa niini maoy nibuto samtang ang usa wala makaulbo tungod kay nabuskag kini.
Naalarma ang kapolisan lakip na ang Explosive and Ordnance unit sa Special Weapons and Tactics dihang nakit-an nga duna pay usa ka wala mobuto, apan pagsusi sa kapolisan mga ordinaryo ra kining pulbura sa mga pabuto nga gisulod og lata dayon gibutangan og pabilo. Wala pa hinuon matino kung si kinsa ang posibleng mibutang sa maong pabuto ug kung unsay motibo niini.
Wala hinuoy nasamdan atol sa hitabo sanglit mingaw pa ang dapit dihang mibuto ang bomba.
Daan nang nagmatngon ang kapolisan sukad niadtong milabay’ng gabii gumikan sa pagpanghasi sa usa ka notadong badlungon diha sa Carbon nga si Jeffrey Lausa kinsa niadtong Miyerkules sa kaadlawon namusil nasad.
Si Lausa niadtong milabay’ng semana gialarma sa kapolisan gumikan sa pagdala-dala niini og granada ug niadtong Miyerkules mihulga kining molabay og granada sa maong lugar.
Niadtong milabay’ng gabii gilabayan og tear gas sa kapolisan ang usa sa mga imburnal sa maong dapit tungod sa pagdudang diha magluklok ang suspek.