Gihatagan og pasidungog ni Chief Supt. Silverio Alarcio,Jr. ang samarong polis nga aksidenteng napusilan dihang gilamok sa mga tawong nag-people’s power dihang gipahigayon ang buy-bust operation batok sa usa ka drug pusher diha sa dakbayan sa Mandaue.
Si Alarcio miadto sa Chong Hua Hospital ug personal nga gidayeg si PO2 Joseph Andrin, sakop sa Station 1 sa Mandaue City Police Office aron itunol ang Medalya ng Sugatang Magiting ug kwartang P5,000.
Sumala pang Alarcio makiangayon lang nga hatagan og pasidungog sa mga maayong binuhatan sa mga polis ilabi na kadtong masamdan sa pagtuman sa iyang trabaho.
Nasayran gikan kang Sr.Supt. Alexander Abadinas atol sa pakighinabi sa mga tigbalita nga mokabat na og P100 mil ang bayranan karon ni Andrin diha sa maong tambalanan sukad nga kini nadala niadtong milabay’ng Martes.
Si Andrin ug mga kaubanan misulod sa sitio Malibu sa maong barangay aron dakpon ang usa ka notadong drug pusher diha sa maong lugar nga naila lang sa angga nga Tads.
Si Tads nadakpan na unta ug naposasan apan atol sa pag-atras sa mga polis diha na mihasmag ang mga residente ug gilabay og mga bato ang mga polis ug si Andrin gilayog sa mga tawo hangtud nga mibuto ang armas niini ug adto naigo sa wala niyang tiil.
Matud pa sa report naigo ang dakong ugat diha sa tiil ni Andrin maong naabunuhan kini og unom ka bag nga dugo ug duna pay laing gikuhang reserbang dugo alang kaniya.
Si Alarcio nagkanayon nga abagahon sa PNP ang bayrunon ni Andrin ug gimandoan na ang PRO7 Comptroller sa paggahin og kwarta alang niini.
Mismong si Mandaue City acting mayor gikatahong misaad og ayuda alang sa maong polis.
Ang MCPO pinaagi ni Abadinas nakakuha og P10,000 nga kwarta nga maoy gigamit sa pasiunang bayad sa maong tambalanan, kini naggikan sa nagkadaiyang sektor ug mga kaubanan sa maong polis.
Giklaro ni Abadinas nga lehitimong operasyon ang gihimo sa iyang mga sakop sanglit una pa gilusad ang operasyon duna na kini koordinasyon sa Philippine Drug Enforcement Agency ug duna sad kini gisumitir nga pre-operation report .