Magtigom na usab ang mga barangay kapitan sa dakbayan sa Sugbu sa sunod nga Sabado, Hunyo 9.
Matud ni ABC president Jingjing Faelnar, nga ang nahisgotang general assembly maoy ikaduha niining tuiga.
Suma ni Faelnar, nga ang maong panagtigom unang gitakda karong Sabado apan kini giuswag tungod sa nakalabay nga piniliay.
Karong adlawa sugdan og pakigtagbo ni Faelnar ang mga barangay kapitan aron pakisayran kung unsa ang ilang mga hisgotan sa general assembly.
Si Faelnar mibutyag nga posibleng malakip sa ilang agenda ang kalabot sa New Government Accounting System (NGAS) ingon man ang bag-ong procurement law.
Sa laing bahin, gipahibalo usab ni Faelnar ang umaabot nilang mga kalihukan sa mosunod nga mga buwan.
Kini naglakip sa "Walk for Healthy You", nga manukad sa Malacañang sa Sugbu paingon sa buhatan sa ABC diha sa South Road Properties (SRP).
Ang maong programa gisugdan sa ABC niadtong miaging tuig sa tuyo nga madasig ang mga barangay officials pag-atiman sa ilang panglawas.
Dungan niini mao ang paglusad sa Agro-fair diin mapalit ang mga produkto sa mga bukirang barangay sa siyudad.
Ang nahisgotang mga kalihukan giingong salmutan sa mga sakop sa ABC ug sa mga molupyo sa dakbayan.