Nibahad si Daanbantayan Mayor Maria Luisa Loot nga mosumbalik og kiha batok sa iyang kaatbang sa politika nga si Augusto “Itok” Corro.
Kini human giingong gisamok-samok gihapon sila ni Corro bisan napilde na kini sa pagka-mayor sa niaging eleksiyon batok sa iyang anak nga si Mayor-elect Sun Shimura.
Usa sa gitinguha ni Loot mao ang pagpasaka og disbarment case batok kang Atty. Liza Corro, igsoon ni Itok kinsa giingon sa mayor nga nigamit sa iyang propesyon sa pagpanghasi sa iyang mga tigpaluyo.
Nagplano usab si Loot sa pagpangayo og danyos batok kang Itok sanglit makahasol sa ilang pamunoan ang ilang pagpasaka og kiha sa korte sa higayun nga mosugod na sa iyang gimbuhaton si Shimura sa munisipyo karong Hulyo 1.
Si Itok pinaagi sa iyang abogado nga si Liza ang bag-ohay lang nisang-at og election protest sa Regional Trial Court sa lungsod sa Bogo aron pagpangayo og recount sa tanang balota sa eleksiyon sa pagka-mayor sa lungsod sa Daanbantayan.
Dili pa makadawat si Itok nga gipilde siya ni Shimura og kapin lang sa 2,000 ka botos.
Matud pa ni Loot nga gawas sa maong kaso, daghan sa katawhan sa lungsod sama sa mga magtutudlo, mga opisyal sa kabarangayan ug mga yanong molupyo ang gipanghasi ni Liza ug gibaharan nga mag-atubang og kaso nunot sa giingong mga anomalosong buhat nga ilang nahimo sa eleksiyon.