‘Away lasing’

Nalantawan na ni Regional Director Carolino Mordeno sa Department of Education (DepEd-7) ang pagsaka sa enrolment sa elementarya og usa ka porsiyento, samtang 2 porsiyento alang sa high school ning tuiga.

Maoy hinungdan nga sa bahin sa mga magtutudlo og lawak-tulunghaan  nagkinahanglan usab og dugang 1,000 alang sa mga magtutudlo ug 1,000 usab alang sa mga lawak-tulunghaan, matud pa niya.

Niining 1,000 ka magtutudlo, 700 niini ang alang sa Cebu, samtang ang 300 alang sa taga Negros Oriental, Siquijor, ug Bohol.

Sa bahin sa mga lawak-saringan, kining 1,000 nia ra sa Cebu kinahanglana, matud pa ni Mordeno.

Bahin sa libro, dili kaayo tantong suliran kining butanga sanglit may igo pang nahibilin nga libro sa miaging tuig nga mahimo pang gamiton karon, matud pa sa director rehiyonal sa DepEd-7.

Sa mga lingkoranan, daan nang gibutyag niya nga ang usbaw nga motungha sa elementarya ug high school nagkinahanglan usab og dugang mga lingkoranan.

Usa sa mga hinungdan sa pagsaka nagpa-enroll sa pampublikong elementarya ug sekondarya mao ang makanunayong kampanya sa kagamhanan pagpatungha sa ilang mga anak pinaagi sa gitawag nga "free and compulsory education", matud pa ni Mordeno.

Kaniadto nabalda ang mga ginikanan sa pagpatungha sa ilang mga anak kay lisodlisoron sila sa ubang mga magtutudlo kon dili makabayad sa mga bayronon sama sa Philippine National Red Cross, Anti-TB, Boy Scout ug Girl Scout of the Philippines ug Parents Teachers  Community Association (PTCA).

Apan karong gipahibawo na nila sa DepEd nga dili na pugson ang mga ginikanang dili makabayad nadasig ang kadaghanan sa pagpa-enrol sa ilang kabataan, matud pa ni Mordeno.