Beyond amazing

Dili usa na ka inutil si Mayor Tomas Osmeña kun kini makita sa publiko nga magsakay og wheel chair, matud pa sa unang ginang Margot Osmeña.

Sa pagkatinuod, lagsik na ang mayor ugaling lang gipahimangnoan siya sa iyang doktor nga likayan una ang pagpangusog ug paghago sa iyang bitiis aron nga dili matandog ang operasyon niini.

Gioperahan ang bitiis sa mayor tungod sa ugat nga napiit ug mibagtok ang dugo niini hinungdan nga mipiliit sa kasakit ang mayor niadtong miaging semana.

Gipahiluna niya kini didto sa hospital sa Manila ug dihang nasayran nga ugat ra diay nga napiit ang hinungdan, dinhi na  niya paoperahi sa Chong Hua Hospital sa Cebu City.

Sulod sa upat ka adlaw nga nagpabilin siya sulod sa tambalanan ug karong nakagawas na, daghang nabati ang unang ginang nga mga pagduda nga malagmit dili na makalakaw ang mayor.

Maoy hinungdan nga maisugong mipasabot si Mrs. Osmeña ngadto sa publiko nga maayo ra ang mayor ug wala maapiktahi ang panghunahuna niini, bisan ang lihok ug kakusganon sa iyang tibuok lawas, nagpabiling normal ug lig-on.

Busa alang kang Mrs. Osmeña kun makita man sa publiko nga magsakay og wheel chair ang mayor, dili buot ipasabot nga inutil na siya kondili pagtuman lang sa awhag sa doktor.