1 sakop sa PBMA 'konbikto

Usa sa walo ka sakop sa Philippine Benevolent Missionaries Association (PBMA) ang nakonbikto sa kasong  paghupot og mga armas samtang pito niini ang na-absuelto sa susamang kaso atol sa "promulgation" sa sala ni Lapulapu City Metropolitan Trial Court in Cities Judge Ester Veloso kagahapon sa buntag.

Human sa duha ka tuig kapin nga pagdungog sa kasong kalapasan sa PD 1866 nga giamendar sa RA 8294 kun "illegal possession of lower-powered firearms" kagahapon sa buntag gikonbikto ni Judge Veloso ang akusado nga si  Master Sgt. Heracleo Rallestan ug mabilanggo sulod sa upat ka tuig, siyam ka bulan ug 11  ka adlaw ngadto na sa lima ka tuig diin pabayron usab kini og P15 mil, samtang ang armas nga kalibre .38 ug mga bala kumpiskado na pabor sa gobyerno.

Samtang ang giabsuwelto ni Judge Veloso mao sila si Nestor Carol, Rosalito Oaper, Elpidio Amarilla, Michael Baylon, Arjulyn Gallarda, Damiano Esconde ug Richard Caballero gumikan kay napakyas ang prosekusyon  pagprobar sa kalambigitan sa maong mga akusado nga nanag-iya sa maong armas nga kalibre .38 ug mga bala niini.

Atol sa gihimong sunodsunod nga pagdungog sa maong kaso, si Rallestan   miangkon sa maong armas nga siya ang nanag-iya niini uban sa pagpakita og mga dukomento sa mga sakop sa SWAT team atol sa gihimong checkpoint sa   Buaya,  Lapulapu sa milabay'ng Disyembre 3, 2004.

Matud pa ni Atty. Noel Archival  nga mopasaka sila og motion for reconsideration sa hukom nga giluwatan ni Judge Veloso gumikan kay ilang ipakita nga inosente si Rallestan ug aduna kini mission order sa paghupot sa maong armas gumikan kay usa  kini ka sakop sa militar. 

Gikalipay usab sa pito ka akusado lakip na ang mga sakop sa ilang pamilya ang pag-absuwelto kanila ni Judge Veloso gumikan kay inosente sila sa maong kaso.

Samtang nanghinaot ang pito ka akusado nga ma-absuwelto usab sila sa kasong ilang giatubang sa sala ni Lapulapu City RTC branch 53  Judge Benedicto Cobarde sa kasong kalapasan sa PD 1866  nga giamendar sa RA 8294 (illegal possesion of  High powered firearms) mga bala, explosibo ug lakip na sa mga nagkadaiyang uniporme sa SWAT team ug militar.

Kahinumduman niadtong Disyembre 3, 2004 sa gabii, nasikop ang walo ka mga sakop sa PBMA luwan sa usa ka L300 van atol sa routine checkpoint nga gipahigayon sa mga sakop sa Lapulapu SWAT team didto sa  Buaya,  Lapulapu.

Sa dihang gihiling ang mga kabtangan sulod sa maong van nasuta nga adunay ubay-ubay nga matang sa high-powered ug low -powered nga armas ug mga bala, eksplosibo ug ubay-ubay nga uniporme sa PNP ug militar.