Patay ang usa ka lalaki kinsa gitabangan og kulata dayong gidunggab samtang siya padulong motambong og disko kagahapon sa kaadlawon diha sa may taytayan sa sitio Lower Kalunasan sa Guadalupe ning dakbayan.
Ang nakabsan sa iyang kinabuhi diha na sa Cebu City Medical Center giilang si Ronie Suico, 28, usa ka construction worker ug residente sa Modesta Street sa nahisgutang lugar.
Gitumbok nga kauban sa mga kalalakin-ang mikulata kaniya nailhan lang sa pangalan nga Awing Gabisay nga pulos mga taga diha sa maong dapit.
Sa imbestigasyon ni PO3 Henry Orbiso sa Homicide Section ang biktima naglakaw diha sa maong dapit dihang gibabagan sa grupo ni Gabisay ug giingnan nga dili nalang padayunon og adto sa disko diha sa ilang lugar.
Ang pagbabag misangpot sa panaglalis hangtud nga gitabangan siya og kulata sa mga suspek. Si Gabisay gikatahong wala matagbaw daling mibunot og kutsilyo dayong dunggab sa biktima makadaghang higayon una pa miikyas.
Ang ig-agaw sa biktima nga si Pedrito Batucan mao nay midala kaniya sa CCMC tungod sa mga samad diha sa iyang tiyan apan pasado alas 5:40 nakabsan kini sa kinabuhi.
Sila si SPO2 Carlito Lirasan sa Guadalupe police station nga miresponde sa maong lugar nakarekober og usa ka 13 pulgadas nga kutsilyo diha sa gihitaboan apan wala na diha ang mga suspek.