Mayo 28, 2007

Usa ka polis nga sakop sa Vice Control Section sa Cebu City Police Office ang nabiktima sa mga akyat bahay gang ug gikuha ang iyang pistola ug daghang mga alahas diha sa iyang lawak kagahapon sa kaadlawon.

Ang gikawatan mao si PO1 Julius Blanco Aniñon, 29, kinsa nagpuyo diha sa Buena Hills Subdivision sa barangay Guadalupe ning dakbayan.

Si Aniñon misumbong sa buhatan sa Theft and Robbery Section nga nawagtang ang iyang kalibre 45 pistola nga may usa ka magazine nga puno og bala; cellphone nga nagkantidad og P18,000; usa ka relo nga Seiko Diver nga nagkantidad og P7,000.

Lakip sa gikawat mao ang iyang bulawang kwintas nga nagkantidad og P13,000; usa ka bulawang bracelet nga nagkantidad og P14,000; bulawang PNP class ring nga nagkantidad og P12,000 ug usa ka Chinese gold nga singsing nga nagkantidad og P10,000.

Matud pa sa maong polis nga diha miagi sa ilang kasilyas ang wala mailhing mga kawatan pinaagi sa pagtangtang sa bildo nga jalousy ug midiretso og sulod sa iyang lawak diin siya natulog.

Ang maong mga nakawat nga butang diha gipatong sa gamayng lamesa sa iyang lawak.