NBI agent inireklamo

Usa ka taxi driver ang gipasanginlang miyembro sa grupo sa mga manglungkabay og mga establisamento ang gidakop sa kapolisan human masubay ang plaka sa iyang taxi unit niadtong milabay'ng Biyernes sa hapon human makabiktima og usa ka travel agency.    

Ang nadakpan giilang si Marvin Silaya, 35, taga barangay Mambaling ug drayber sa CTC taxi nga may plakang GWV-835 human kini masubay sa Theft and Robbery Section.

Dunay mga estambay nga mitug-an sa TRS nga mao kini gikargahan sa mga kinawat nga tulo ka CPU,tulo ka monitor sa computer ug usa ka xerox copier gikan sa Royal Prince Travel International diha sa Osmeña Blvd. sa Capitol Site niadtong Huwebes sa gabii.

Nadiskubrehan ang pagpanglungkab pasado alas 8 niadtong Biyernes sa buntag.

Human madakpi si Silaya, gitultulan niya ang TRS sa gipuy-an sa mga kaubanan apan nakaikyas na ang tulo ka mga kauban niini nga gikatahong pulos taga Nasipit,Surigao.

Apan nasakmit sa kapolisan ang mga gamit nila pagpanglungkab sama sa bolt cutter, bara-de-kabra ug uban pa atol sa gihimong follow-up operation diha sa ilang gipuy-ang apartment sa Duljo-Fatima.

Ang maong taxi nga may samang plaka sa nakit-ang gikargahan gihapon sa mga kinawat nga tulo ka CPU gikan sa Web 9 Internet café sa dalanJunquera niadtong Mayo 23 sa kaadlawon.

Daling giadto sa kapulisan ang garahian sa taxi ug gisikop si Silaya.

Gitultulan usab ni Silaya ang grupo ni Chief Insp. Alexis Relado sa usa ka hardware diha sa dalan M.J.Cuenco sa barangay San Roque diin nila gibaligya ang mga kinawat.

Apan tulo ra ka CPU ang nabawi sa kapolisan nga nagbalor og P120,000, gikatahong iya sa maong travel agency ang maong mga CPU.

Nagtuo si Relado nga napindotan na ni Silaya ang iyang mga kauban hinungdan nga nakaikyas. Mibutyag si Silaya nga lakip sa ilang gipanglungkaban mao ang tulo ka mga buhatan sa LBC sa Legaspi, Mabolo ug Pardo ug usa ka motorshop sa dalan N. Bacalso.