Gentle souls

Patay ang usa ka suspetsadong kawatan ug naangol ang usa ka kauban niini nga menor de edad human sila pamusila sa duha ka wala mailhing mga lalaki gamit ang .45 kalibre nga pistola kagahapon sa kaadlawon diha sa Sitio Molave, Barangay Tabunok, dakbayan sa Talisay.

Ang mga gipamusil giila sa kapolisan sa siyudad nga si “John” (ngalan gipugngan) 16-anyos taga dakbayan sa Sugbu ug Edmar Najera, 23, taga dakbayan sa Talisay.

Si John nakaangkon og samad pinusilan sa ibabaw'ng bahin sa wala niyang bukton diin ang bala milahos samtang si Najera nakaangkon usab og samad pinusilan sa iyang lawas ug ang bala milahos usab ug duha ka samad pinusilan sa ulo.

Si Najera gideklara nga patay na sa doctor sa Talisay district hospital nga naabot sa maong tambalanan samtang si John gibalhin sa Vicente Sotto Memorial Medical Center niining dakbayan.

Gikataho nga ang mga suspetsado naglibwag og panagan palayo sa lugar nga nahitaboan human sa maong insidente.

Si Police Inspector Rolly Lauron, hepe sa homicide section sa kapolisan sa siyudad mibutyag kagahapon sa Banat News nga si John miangkon nga nanguha sila og mga puthaw nga lingkuranan gikan sa usa ka balay diin naaktohan kini sa mga mipusil  kanila.

Ang mga nahisgutang lingkuranan gisulod nila ni John ug Najera sa usa ka sako ug nabawi kini sa mga polis.

Si Lauron mibutyag nga ang lingkuranan nga gisulod sa sako nakuha nila tulo ka dupa gikan sa natumbahan ni Najera ug nakakuha usab sila og upat ka kabhang sa bala ug usa ka buhing bala sa nahisgutang kalibre sa pusil.

Ang kapolisan sa dakbayan mipahigayon og follow-up nga imbestigasyon sa maong hitabo.