Folk dances: Pride of the Filipino

Nasikop sa mga polis sa dakbayan sa Talisay ang usa ka gipasanginlang  notadong tulisan niadtong Huwebes sa gabii diha sa national highway sa Barangay Lawaan III sa nahisgutang siyudad.

Ang suspetsado mao si Lito Oros, residente sa Sitio Kawatan, Barangay Tabunok, nagtingkagol karon diha sa Talisay city police detention cell .

Dala nila ni SPO3 Ricardo Viacrusis, PO3 Arnold Damasco ug PO2 Reynaldo Hoybia ang warrant of arrest nga giluwatan ni Regional Trial Court Judge Generosa Labra sa branch 23 batok ni Oros dihang ila kining gisikop.

 Si Oros adunay kasong attempted robbery diha sa sala ni Labra ug nagkinahanglan kining mobayad og P5 mil nga multa sa iyang temporaryong kagawasan.

Si PO2 Joel Rosales polis sa Talisay sa pakighinabi niini sa Banat News kagahapon mibutyag nga si Oros suspetsado sa pagpanulis sa mga pasahero sa PUJ dili lang sa Talisay lakip na sa lungsod sa Minglanilla, dakbayan sa Mandaue ug Sugbu.

Si PO2 Leandro Azarcon duty desk officer sa kapolisan sa siyudad mibutyag kagahapon sa Banat News  nga si Oros nagtago-tago kini ug dugay na nilang gipangita.

Matud ni Azarcon nga si Oros magsige kini og kuyog ug si Alvin Timog nga usa usab ka notadong tulisan kaniadto.

Kahinumduman nga si Timog namatay kini human mapusili sa mga polis tungod kay misuway sa pagsukol sa mga misikop kaniya sa milabay'ng mga buwan.