Political dynasties: For whose interest?

Disidido si Konsehal Gerardo Carillo nga ipalabang og balik sa konseho sa siyudad ang iyang ordinansa nga magsilot sa pribadong mga tambalanan nga motanggong sa mga pasyente nga dili makabayad sa hospital bills.

Kini bisan pa man sa hugot nga pagsupak sa mga tag-iya og hospital sa dakbayan kaniadto ug taliwala usab sa kontrobersiyal nga Acta Republika 9439, kun ang Hospital Detention Law.

Base sa maong balaod mahimong mabilanggo hangtod sa unom ka buwan ug mamultahan og moabot ngadto sa P50 mil ang mga opisyal o medical institutions nga mopugong sa ilang mga pasyente paggawas sa tambalanan nga dili makabayad sa ilang obligasyon.

Apan sa ipalabang nga ordinansahon ni Carillo, usa ka tuig nga pagkabilanggo ang matagamtaman sa mga doktor o sa mga hospital personnel nga mo-“hostage” sa ilang mga pasyente gawas sa P5 mil nga multa nga maoy labing taas nga penalty sa usa ka ordinansa sa siyudad.

Gipasabot sa konsehal nga dunay gamay nga kalainan ang iyang ipalabang nga ordinansahon tungod kay dili lang mga pasyente ang protehean niini lakip na ang mabugtuan sa kinabuhi sulod sa hospital nga dili i-release sa mga tambalanan kun dili mabayran ang hospital bill.

Sumala pa ni Carillo nga ang subling pagpalabang sa nahisgotang ordinansahon maoy iyang hatagan og prayoridad atol sa ika-11 nga konseho sa dakbayan.

Kini tungod kay sumala sa konsehal  siya padayong nakadawat og mga reklamo labot sa mga pribadong mga tambalanan sa siyudad nga dili morelease sa mga pasyente nga dili makabayad sa hospital bills.

Alang kang Carillo dili makatarunganon ang maong paagi tungod kay magkadako ang bayranan sa pasyente o sa tagtungod ba hinuon  ug mosamot nga kini dili makabayad sa ilang tulobagon sa tambalanan.