Nagupok ang kabukogan sa usa ka supervisor sa usa ka minahan sa Balaas, Argao dihang aksidente kining nahagbong niadtong miaging adlaw ngadto sa tunnel nga maoy nakaingon sa hinanaling kamatayon.
Si SPO1 Rodrigo Tio nga gikahinabi sa Banat News miila sa biktima nga mao si Rodrigo Jorhe, 48, minyo nga nagpuyo sa maong dapit.
Si SPO1 Tio miingon nga gikan sa ika-14 nga level nga nagtungtong ang biktima ug kalit lang natapigas ang tiil ug nahagbong paingon sa ika-17 nga level sa maong minahan.
Dali untang gitabang sa mga kauban sa trabaho ang biktima pinaagi sa paghigot og pisi ug gidala sa ibabaw nga bahin sa minahan.
Dugang pa ni SPO1 Tio nga dali nga gidala ang biktima sa district hospital sa maong lugar apan gideklarar kini sa mga doktor nga patay na.