Mokabat sa 1,280 ka mga kawani sa kagamhanan sa dakbayan sa Mandaue ang hayan mawad-an sa ilang trabaho sa pag-asumer sa bag-ong napili nga mayor sa dakbayan sa Mandaue nga si Mayor-elect Jonas Cortes.
Si Janneth Trinidad, human resource management officer sa maong dakbayan, nga gikahinabi sa Banat News mipadayag nga ang maong gidaghanon nga mawad-an sa ilang trabaho sa city hall mao ang naglakip sa 280 ka mga casual, 1,000 ka mga job order ug contractual nga mga kawani.
Dugang pa niya ang kasagaran sa mga trabahante ubos sa job order mao ang nadestino sa clean and green program, nadestino sa paghipos sa basura ug uban pa.
Giklaro niya nga may mga kawani sa city hall ug mga consultant nga migawas sa ilang trabaho dihang gipaubos sa preventive suspension si Mayor Thadeo Ouano.
Si Trinidad miingon nga hangtod lamang sa Hunyo 30 karong tuiga ang appointment sa maong mga kawani sa city hall nga mao usab ang pag-asumer sa bag-ong administrasyon.