Gideklarar na ang barangay To-ong sa siyudad sa Sugbu ang ilang barangay nga ubos sa state of calamity.
Kini tungod sa giingong ka-seryoso na sa ilang problema sa tubig nga giingong nakahatag na og kahasol sa mga molupyo.
Tumong sa konseho sa barangay sa maong deklarasyon nga magamit ang ilang calamity fund alang sa pagpalit sa gikinahanglang kagamitan.
Kini sama sa rubber/polytelene hose, Gl pipes, ug ubang materyales nga ihulip sa guba na nga mga piping materials sa ilang water reservoir.
Lakip sa posibleng gamitan sa nahisgotang mga materyales mao ang pag-tap sa barangay To-ong ngadto sa ubang tinubdan sa tubig.
Tinguha sa mga barangay official nga makuha ang igong konsumo sa tubig sa ilang mga lumolupyo.
Ang padayong kainit sa panahon maoy gitumbok sa mga opisyal sa barangay To-ong sa kanihit karon og tubig sa ilang lugar.
Hinoon ang konseho sa dakbayan sa Sugbu, mipalabang na og resolusyon nga naggahin og tunga sa milyon ka pesos aron ipalit og mga hose.
Kini i-apod apod ngadto sa mga bukirang barangay sa siyudad nga una nang gideklarar sa city council nga ubos sa state of calamity.
Kagahapong adlawa laing resolusyon usab ang gipalabang nila ni konsehal Gerry Carillo ug Hilario Davide III nga naggahin og tres milyones pesos.
Ang maong kantidad ipamalit og mga plastic drum ug dugang mga hose, alang sa mga bukirang barangay nga giingong naapektuhan sa kainit sa panahon.
Kini sama sa mga barangay Adlaon, Agsungot, Binaliw, Budla-an, Busay, Guba, Mabini, Malubog, Pit-os, Pulangbato, San Jose, Sirao ug Taptap.
Lakip usab sa gikatahong naapektahan sa El Niño phenomenon mao ang barangay Babag, Bonbon, Pamutan, Pong-ol Sibugay, Sapangdaku, Sinsin, Sudlon 1, Sudlon 2, Tabunan ug Tagba-o.