Mga polis sa dakbayan sa Talisay giuli-an na og tag P183 nga sobra sa ilang allowance nga gihuptan sa ilang hepe nga si Supt. Romeo Perigo.
Kahinumduman nga ang mga polis sa Talisay mireklamo tungod kay sa P360 nga allowance nga gigahin alang sa ilang pagserbisyo sa eleksiyon gihatagan lang sila og tag P150 sa ilang hepe.
Kahinumduman usab nga si Perigo mitataw nga ang wala niya paghurot paghatag sa allowance sa iyang mga sakop tungod kay dili lang usa ka adlaw ang kalihukan sa eleksiyon.
Matud sa hepe nga ang kwartang iyang gihuptan gipamalit niya og pagkaon ug duna siya’y liquidation niini ug ang sobra iuli usab niya ngadto sa iyang mga sakop.
Si Perigo sa pakighinabi kagahapon sa Banat News mitataw nga giulian na niya og sobra ang iyang mga sakop diin si Inspector Rully Lauron ang iyang gitugyanan niini.
Usa sa mga polis sa siyudad nga si PO2 Harrison Quiñanola mitataw usab nga niadtong Martes sa gabii naulian siya og P183 ug ang uban niyang mga kauban apan ang kadtong mga off duty posibleng kagahapon na maulii sa sobra.
Si Perigo sa iyang bahin usab mibutyag nga adunay duha ka item nga wala na makaparesibohi sa iyang gisugo diin nagkantidad kini og sobra sa P1,200 iya na lang gitaplan.
Mikabat sa sobra sa P3 mil ang nagasto sa pagkaon nga gipamalit atol sa kalihukan sa eleksiyon ug ang sobra sa kwarta mikabat usab sa sobra sa P11 mil nga mao karoy gibahin-bahin og uli ngadto sa mga polis.