Si Konsehal Dennis Basillote ireklamo ngadto sa Ombudsman sa staff ni Bise Mayor Aberdovey Belleza nga iyang gidukol sa milabay’ng adlaw.
Si Menchulyn Dagode isog kaayo nga mibutyag kagahapon sa Banat News nga pasakaan niya og reklamo ngadto sa Ombudsman si Basillote tungod sa gibuhat niini ngadto kaniya.
Matud ni Dagode kagahapon nga mibukol ang iyang ulo sa pagdukol ni Basillote ngadto kaniya ug iya na kining gikonsulta og abogado para maduso dayon niya ang iyang reklamo.
Gitataw ni Dagode nga siya ug ang pag-umangkon ni Basillote nga si Ellen Echavez maoy dunay personal nga gibangian ug nag-away sila pinaagi sa mensahe sa text.
Si Dagode mipasangil ni Echavez nga gibiay-biay ang iyang amo nga si Belleza nga napildi hinungdan nga mibawos usab siya sa gibuhat ni Echavez.
Si Dagode midungag nga gipabasa ni Echavez ngadto ni Basillote ang iyang mensahe hinungdan nga nasuko ang konsehal.
Kagahapon usab si Basillote sa pakighinabi niini sa Banat News mibahad usab nga mopasaka og reklamong pagpakaulaw batok ni Dagode ug magpa-blotter usab siya sa polis.
Si Echavez sa pakighinabi sa Banat News kagahapon mipabasa sa iyang nadawat nga mensahe sa text gikan ni Dagode nga nagkanayon “uy napildi pero pamugas okay raman na pildi daghan man sapi “S” lang mo, daghan man kag sapi wala lagi ka hatag imo uyoan sige sop-sop ni vice palooy para tagaan ug sapi ni daog sa kwarta ni vice imo uyoan kinsa kaha way uwaw.”
“Ha ha ha ha ha, daog sila pero mura lang gihapon og trapo g lakaw nidaog sa kwarta dili iya”.
Si Echavez miangkon usab nga duna silay personal nga giawayan ni Dagode apan andam unta siya magkauli ang ilang maayong relasyon sa wala pa moulbo ang ulahing gubot.