2 kapitan sa Mandaue molingkod sa konseho

Duha ka barangay kapitan sa    Mandaue  hingpit  nga mobiya sa ilang katungdanan human sa ilang pagkapili  isip mga konsehal sa dakbayan sa miaging Mayo 14 nga piniliay.

Ang maong mga barangay kapitan nga hingpit na nga mobiya sa ilang katungdanan sa barangay mao sila si  kapitan Emiliano Rosal ug  Editha Cabahug nga mga sakop sa Power Team 4 ni  Thadeo Jovito “Jonkie” Ouano kinsa  nakaangkon og kapildihan.

Si Rosal  kapitan sa Tabok   hulipan ni first barangay councilor, Dario Tariman ug si Cabahug  hulipan usab ni first councilor Erlinda Taruna sa   Looc.

Si Rosal nga gikahinabi sa Banat News miingon nga ang iyang kadaugan isip konsehal sa dakbayan maoy pagpakita sa ilang pagsalig sa mga Mandauehanon sa iyang katakus.

Gitug-an ni Rosal nga ang iyang kakugi ug ang matinud-anong panirbisyo sa katawhan sa barangay maoy naghatag kaniya og daghang pasidungog sa mga indigay nga gipasiugdahan sa Ten Most Outstanding Barangay Official  (Toboy) Award.

Samtang sa laing bahin, si  Cabahug nga gikahinabi sa Banat News   miingon nga wala gayod siya maglaum nga modaug sa miaging piniliay.

Nunot niini iyang giandam ang kapildihan sanglit tulo man sila ka mga Cabahug sa Mandaue  nga mikandidato sa maong katungdanan nga naglakip kanila ni Cesar Cabahug ug Elmer Cabahug nga nagpasubli sa iyang ikaduhang termino.