Maguindanao canvass deferred

Usa ka Field Training Program nga polis maoy gitumbok nga nakatubag sa telepono sa usa ka reklamante diha sa Mabolo police station nga mipasangil nga wala siya atimana ug gipusdakan hinuon siya og telepono.

Si Sr. Supt. Patrocinio Comendador mitug-an sa mga tigbalita kagahapon nga si PO1 Romeo Alquino nga nadestino sa maong buhatan ang nakatubag sa telepono niadtong milabay'ng buntag.

Usa ka Lalaine Durano, administration manager sa Blue Planet sa dalan J. Luna Avenue, barangay Mabolo ang mitawag sa Mabolo police station human nila madiskubreheng gilungkab ang ilang establisamento.

Apan gipasangil nga wala siya atimana sa polis nga nakatubag ug gipusdakan hinuon siya og telepono duha ka higayon, tungod sa kadismaya sa pagtagad sa Mabolo didto nalang kini midangop sa Theft and Robbery Section.

Si Comendador nagkanayon nga usa ka 'discourtesy' ang nahimo sa maong polis ug mamahimo kining mapasakaan og kasong administratiba tungod sa iregularidad sa pagtuman sa iyang trabaho ug mahimong kasuhan og simple misconduct ngadto na sa grave misconduct.

Nunot niini gimando ni Comendador kang Supt. Armando Radoc, hepe sa Mabolo police station sa pakig-coordinate kang TRS chief, Chief Insp. Alexis Relado nga makuhaan og pamahayag ang reklamante aron pormal nga masang-at ang reklamo.

Giangkon ni Comendador nga si Alquino dili pa sakop sa administratibang gahum sa CCPO apan mahimo silang mopahigayon og imbestigasyon batok kaniya ug isumitir ang resulta ngadto sa Regional Training School-7 ug sa Police Regional Office 7 sa desisyon.