Pro-Arroyo coalition keeps control of House

Laing duha ka karton nga gidudahang illegal nga drugas nasakmit sa mga elemento sa Philippine Drugs Enforcement Agency-7 kagahapon sa buntag diha sa LBC Hari Ng Padala Legaspi branch ning dakbayan sa Sugbu.

Ang duha ka karton nga nakuha maoy sumpay sa maong operasyon sa miaging adlaw nga gibanabanang mokabat og P4 milyon nga mga regulated drugs diha sa Mandaue Post Office niadtong Lunes.

Nadakpan sa PDEA-7 si Isidra Bacang, 24, nga taga Malabuyoc, Sugbu ug Rodrigo Estillore,  35,  lumad nga taga Inabanga, Bohol human nagpadala og mga packages ug envelopes nga giingong ilegal nga drugas ngadto sa postal clerk sa Mandaue Post Office.

Usa ka Joseph Van Hemelen, usa ka Belgian national ug nagpuyo sa usa ka subdivision diha sa barangay Talamban ning dakbayan sa Sugbu nga matud pa maoy nanag-iya  sa mga valium nga nakuha sa taga PDEA-7.

Matud ni PDEA-7 director Sr. Supt. Aamado  Marquez Jr. human nila madakpi ang duha ug sa ilang gihimong tactical interrogation mitug-an kanila nga dunay moabot nga laing shipment kagahapon sa buntag nga gipaagi sa LBC.

Subay niini, si Marquez mipadala sa iyang mga sakop pasado alas 10 sa buntag nga gipangulohan ni SPO1 Ramil Villaluz ug mikuyog usab sila si Bacang ug Estillore.

Ang maong package gi-address ngadto ni Bacang hinungdan nga ang personnel sa LBC mitunol dayon ngadto ni Bacang gani ang personnel wala na mangayo og identification card  (ID) nga nagpasabot  nga regular costumer sila si Bacang ug Estillore.

Matud pang Marquez ila  gyung giablihan ang duha ka karton atubangan sa personnel sa LBC staff ug nasuta ang sulod niini puros Valium ug Bivotril tablets nga gibana-banang mokabat  og  P500,000

Kasong transporting ug possession of  illegal drugs ang giandam sa taga PDEA batok kang Bacang, Estillore ug Hemelen.

Giklaro usab ni Marquez sa pagkasakmit sa regulated drugs dinhi sa Sugbu nagpasabot kini nga transshipment point apan wala pa gyud niya gitug-an kun  diin gikan kining matang sa drugas.

Ang mga tabletas adto kini ipadala sa laing nasud sama sa Sweden ug Amerika.

Si Bacang nga nahinabi sa Banat News mitug-an nga gi-hire siya sa milabay'ng tuig 2006 isip usa ka salesclerk sa dihang si Hemelen nanag-iya pa sa Priscilla pharmacy diha sa Sto Niño, ning dakbayan.