RP 5 settles for 4th, trains sights on SEABA

Si Police Superintendent Romeo Perigo hepe sa kapolisan sa Talisay mipahigayon og tigom kagahapon sa mga sakop niyang polis kabahin sa isyu sa meal allowance nga P360 sa kapolisan atol sa eleksiyon.

Gikataho nga sa P360 nga meal allowance matag polis P150 lang ang gihatag ni Perigo matag usa sa iyang mga sakop.

Ang mga polis nakurat dihang gisuna sila ni Provincial Police Director Carmelo Valmoria kung okay ba nila ang P360 nga allowance.

Si Perigo sa pakighinabi kagahapon sa Banat News mitataw nga wala ihatag niya tanang allowance tungod kay iya kining gipamalit og pagkaon nga gibahin-bahin sa pila nila ka adlaw nga serbisyo ug lakip sa mga nakakaon sa pagkaon ang mga non-uniform personnel (NUP) ug ang ilang mga civilian employee tungod kay  miserbisyo  sab sila  atol sa canvassing.

Matud ni Perigo nga dili lang niadtong Mayo 14 Lunes ang ilang pagpahigayon sa serbisyo miabot kini hangtud niadtong Huwebes.

Ang hepe nagkanayon nga posibleng “miss communication” lang ang nahitabo sa maong insidente tungod kay wala dayon niya mapasabot niini ang iyang mga sakop tungod sa ilang ka busy atol sa eleksiyon.

Si Perigo mitataw usab nga gipakita niya sa iyang mga sakop kagahapon ang liquidation sa mga nagasto para mahibaw-an kung asa paingon ang ubang kwarta nga wala niya ihatag ug kung aduna kini sobra ihatag usab niya kini ngadto sa mga polis.

Adunay mga polis nga nagbagolbol nga wala sila makakaon apan matud ni Perigo nga posibleng ang maong mga polis wala diha sa ilang pwesto dihang gihatud ang mga pagkaon diin mga poso, barbecue ug lechon manok ug sa snacks aduna siya’y gipapalit nga mga pan, hamburger ug mga kape.

Sa laing bahin usab adunay mikatap nga huhongihong nga adunay gihatag nga tag P1,500 nga allowance ang kagamhanan sa siyudad para sa mga polis atol sa ilang serbisyo sa eleksiyon apan ang maong taho gihimakak ni Edgardo Mabunay, Talisay City Budget Officer ug ni Perigo.

Apan giangkon ni Mabunay nga ang mga polis nga nadestino sa canvassing area ilang giapil sa ilang pack lunch o mga pagkaon apan wala sila mohatag og cash allowance gawas sa binuwan nga tag P1,000 nga cash incentives sa mga polis.

Si Perigo usab sa iyang bahin mitataw nga ang nadawat sa mga polis gikan sa kagamhanan sa dakbayan mao lang ang nahisgutang P1,000 nga binuwan  nga cash incentive.

Ang hepe midungag nga nasagmuyo siya sa maong mga taho ug giingnan niya ang iyang mga sakop nga kung duna kini reklamo siya ang direktahon sa pagsulti niini