Are we there yet?

Patay ang usa ka mag-uuma human kini pusila sa wala mailhing lalaki pipila ka tikang gikan sa pultahan sa ilang balay diha sa sitio Luyo  Adlaon ning dakbayan niadtong milabay'ng gabii.

Ang namatay giilang si Jerry Condiman,24, residente sa maong lugar kinsa nakaangkon og usa ka samad pinusilan diha sa tuong bahin sa ulo.

Wala pa matino sa kapolisan kung si kinsa ang mipusil sa biktima apan gituuhang nag-atang na kining daan sa pag-abot sa biktima diha sa iyang balay.

Sa imbestigasyon sa kapolisan ang biktima padulong na sulod sa ilang balay sumala pa sa asawa niining si Helen dihang kalit lang mipaka ang usa ka buto sa armas gikan sa gawas.

Diha nalang nakit-an ni Helen ang bana nga nagbuy-od na sa may pultahan ug nagkadugo ang ulo.

Usa ka basiyo sa .30 caliber Carbine Rifle ang napalgan diha sa crime scene ug gituuhang maoy nakaingon sa hinanaling kamatayon sa biktima.

Ang Homicide Section padayon pang nagtigum og dugang impormasyon kabahin sa pagkatawo sa responsable ug sa motibo niini sa pagpatay sa biktima.