Honoraria sa PNP gikapnan

Gipaimbestigar na ni Sr.Supt. Lani-O Nerez, hepe sa Task Force Hope sa Police Regional Office –7 ang kabahin sa pasangil nga gipangkapnan ang gitaganang allowance sa mga polis nga miserbisyo sa miagi nga eleksyon.

Gikompirmar kini Chief Supt. Ronald Roderos, Deputy Regional Director for Administration kabahin sa maong kahiwian diha sa dakbayan sa Talisay.

Matod ni Roderos, nagpatawag og meeting si Police Regional Office VII Director Silverio Alarcio,Jr. kagahapon ug nahisgutan ang maong alegasyon.

Si Nerez, kinsa namuno sa Task Force Hope diin katuyuan ang pagdumala seguridad sa election period, mimando ni Cebu Provincial Police Office director, Carmelo Valmoria sa pagsuta sa kamatuoran sa alegasyon sa mga nasakupang polis sa Talisay.

Sa pagkakaron, si Roderos nagkanayon, ang imbestigaron kabahin sa iregularidad mao si Talisay City Police chief Romeo Perigo.

Hayan mosunod usab ang pagpangayo og liquidation sa ubang mga provincial, city og municipal directors tungod kay dunay dakong posibilidad nga gikapnan usab ang mga allowance sa mga polis nga gikan sa Comelec.

Gialegar sa mga polis nakadawat lang sila og tag P150 nga allowance sulod sa tulo ka adlaw apan nakurat sila dihang nahibaw-an nila kang Valmoria sa miaging Miyerkules nga P360 ang budget kun P120 matag adlaw ang matag polis.

Si Valmoria nagtuo nga basin gipalit og mga pagkaon sa istasyonan ang nabiling kantidad ug ang nahibilin mao na ang gipang-apod apod sa mga polis.

Apan matod sa mga polis, wala sila hatagi og pagkaon gikan sa ilang estasyonan ug kung duna man gikan na kini  sa lokal nga pangagamhanan.

Si Comelec regional director Rene Rey Buac mikompirmar nga adunay budget nga gi-turn over ang kauluhan sa Comelec ngadto sa kauluhan usab sa Philippine National Police tungod sa ilang pagserbisyo sa eleksyon.

Wala hinuon matino ni Buac ang maong kantidad apan wala na moagi sa ilang buhatan ang maong budget.

Nasayran sa Banat News, nga adunay mga polis sa mga munisipyo ug ubang units nga nakadawat og nagkadaiyang kantidad, gikan sa P150 ngadto sa P200, apan sa Cebu City Police Office husto ang nadawat nilang allowance.

Si Roderos nagkanayon nga gikinahanglan nga ipahibalo sa mga hepe kung si kinsa ang gitahasan sa pag-apod apod ug kun diin kini gikan ingon man kung pila gyud ang kantidad.

Adunay mga 6000 ka mga polis sa tibuok PRO-7.