Arestado ang gitumbok nga lider sa mga carnapper dinhi sa Sugbu human niini madumbuli ang sakyanan sa usa ka opisyal sa Criminal Investigation and Detection Group-7 sa milabay'ng gabii diha sa dalan Mabini sa Parian ning dakbayan.
Ang gidakop mao si Marcelo Cabahug, alyas Marsing, 66,taga Pagsabungan, Mandaue City kinsa dugay nang gipangita sa CIDG-7 tungod sa nagpatong-patong nga kasong carnapping nga gipasaka batok kaniya.
Ang opisyal sa CIDG nga iyang nadumbulan mao si Chief Inspector Rex Derilo kinsa niadtong tungura nipalit og tambal alang sa iyang kapikas nga nasakit. Ang sakyanan ni Derilo nga Pajero nadasmagan sa luyo sa Mercedez Benz ni Cabahug.
Diha-diha mikanaog si Derilo ug giestoryahan si Cabahug apan gikatahong misinggit si Cabahug kaniya nga “Gasgas ra na!” Si Derilo wala hinuon mosugot ug miingon kang Cabahug nga motawag siya og traffic enforcer nga mohimo sa sketch sa insidente.
Apan gikatahong si Cabahug nga nanimaho og bino mibitad sa liog ni Derilo ug gipatan-aw ang polis sa gibitay nga PNP-Traffic Management Group ID niini diha sa sakyanan ni Cabahug dungan sa pagpailang siya si Major Marcelo Cabahug.
Si Derilo pagkadungog sa pangalan sa suspek ug nasigpatan ang armas diha sa tupad niini daling mibalik sa iyang sakyanan ug mikuha sa iyang armas apan gikatahong mipasutoy og padagan si Cabahug hinungdan sa nahitabong ginukdanay.
Diha na madakpi si Cabahug sa may Cebu Metropolitan Cathedral inabagan nila ni Chief Insp. Fermin Armendares III sa CIDG dihang gibiyaan ni Cabahug ang sakyanan.
Si Cabahug sumala pang Sr.Supt. Jorge Corpuz, direktor sa CIDG7, dugay na nilang gipangita tungod sa mga kaso niini ug giswerte lang ang CIDG sa pagkasugat ni Derilo kaniya.
Nakuha diha sa sakyanan ni Cabahug ang duha ka .45 kalibre nga pistola ug usa ka .380 pistol, ID sa Criminal Investigation and Intelligence Branch, Barangay Intelligence Network ug TMG ID. Walay napakitang lisensya sa mga armas si Cabahug.
Positibo usab siya sa liquor test. Nakuha diha sulod sa iyang sakyanan ang duha ka botelyang bino ug mga tubig ingon man baso.
Si Cabahug mihimakak nga siya maoy lider sa mga carnapper dinhi sa Sugbu base sa pasangil kaniya sa CIDG-7 apan miangkon kining nasayod siyang daghan nang kasong gipasaka kaniya ang maong police unit may labot sa carnapping.
Matud pa niya nga legal ang pagpamaligya niya og sakyanan sanglit mismong ang PNP Crime Laboratory , Land Transportation Office ug TMG mi-clear sa maong mga sakyanan maong wala siya’y kalibutan nga kinarnap ang iyang gibaligyang sakyanan.
Si Corpuz mipasangil nga maong makalusot ang maong mga sakyanan gumikan kay dunay mga kakunsabo si Cabahug diha sa mga nahisgutang ahensya gani pipila sa mga opisyales sa maong mga buhatan ang giapil na og pasaka og kaso diha sa buhatan sa Visayas Ombudsman.