Usa ka multicab drayber ang gipusil patay sa wala mailhing mga lalaki kagahapon sa buntag sa Eskina Veco sa barangay North Poblacion lungsod sa Naga.
Giila ang biktima nga si Lito Batismo, hingkod ang pangidaron, ug residente sa Langtad sa naasoy'ng lungsod.
Base sa imbestigasyon sa kapolisan, pasahero ni Batismo nga naglingkod sa frontseat ang mipusil kaniya human kini mihunong pag-abot sa gihitaboan.
Ang biktima gipusil ka tulo ka higayon ginamit ang 9 mm kalibre nga pistola tumong sa ulo hinungdan sa iyang kamatayon.
Miikyas dihadiha ang suspetsado ug misakay sa motorsiklo sa nagpaabot nga kauban. Ang maong motorsiklo gikatahong nagsunod-sunod na sa multicab sukad nga misakay ang suspek.
Gidala dayon sa Minglanilla District Hospital si Batismo apan gideklarar kining patay. Anaa na karon ang lawas ni Batismo sa Saint Francis Funeral Homes.
Wala pa mahibaw-i sa kapolisan ang motibo sa pagpatay.