Milabay na ang eleksiyon apan hangtod karon ang mga lider ug mga watchers ni Gabriel Leyson sa mga presinto nagbagulbol tungod kay wala sila makadawat og mga suhol sa ilang pagserbisyo.
Sila si Boy Magkawas, Aying Roa, Yeyen Garces ug Rodora Picera sa pakighinabi nila sa Banat News nagkanayon nga bisan og piso wala silay nadawat nga suhol sa ilang pagserbisyo sukad pa niadtong pagsugod sa pagpangampanya sa buwan sa Abril.
Ang upat nadestino kining mga precinct leader ug assistant precinct leader diha sa Talisay Central School.
Matud sa upat nga sila na lang gani ang namalit og pagkaon ug ice water nga ilang mainom tungod kay wala man sila hatdi og pagkaon dihang mitambong sila sa pagpahigayon sa canvassing.
Si Virgie Plaza, taga Poblacion mibutyag nga usa siya sa lig-on nga tigsuporta ni Leyson gani sa matag pagpangampanya ni Leyson diha sa mga barangay sa Talisay magkuyog-kuyog man siya bisan og wala siya’y suhol nga madawat.
Apan sa maong hitabo nasagmuyo siya ug dili siya motuo nga walay budget nga gihatag ang kampo ni Leyson aron isuhol sa mga nagserbisyo.
Kuyanap kaayo sa dakbayan sa Talisay karon nga si kanhi Mayor Deliah Tiu ang gipasanginlang naghupot sa kuwarta nga isuhol sa mga leader, assistant leader sa mga presinto, watchers ug mga movers.
Si Tiu sa pakighinabi niini sa Banat News mihimakak sa maong pasangil batok kaniya ug nagkanayon kini nga dili siya campaign manager ni Leyson ug gihangyo lang siya niini nga motabang.
Apan giangkon ni Tiu nga ang gihuptan niyang budget mao lang ang para sa mga movers ug gani giandam na niya ang liquidation niini para iuli niya ngadto ni Leyson ang sobra.
Matud ni Tiu nga niadtong Lunes nakigkita siya ni Leyson ug saksi niini si Marilyn Rabago, kalihim ni Leyson diin iya kining gisultihan nga ang mga nahisgutang mga leaders ug assistant leaders naningil sa ilang mga suhol.
Si Tiu nagkanayon nga mikuot pa gani siya sa iyang kaugalingong kwarta aron ihatag og pamiliti sa mga mitabang sa grupo.
Si Leyson sa iyang bahin, sa pakighinabi kagahapon sa Banat News mitataw nga mihatag siya og budget ni Tiu para sa mga leader, assistant leader, watchers ug movers.
Matud ni Leyson nga ang iyang gihatag nga kantidad ngadto ni Tiu parehas sa kantidad nga iyang gihatag alang sa ilang organisasyon nga Abante Talisay apan wala ibutyag niini ang kantidad nga iyang nahatag.
Gibutyag usab ni Leyson nga aduna pa siya’y gipanghatag nga mga yellow cards ngadto sa mga kandidato nga ubos sa ilang partido ug mga lider diin ang maong mga yellow card aron unta ipang-apod-apod sa mga tawo apan gikataho nga wala kini ipanghatag.
Gipasabot ni Leyson nga ang kagamitan sa maong yellow cards mao nga matabangan og trabaho ang mga maghupot niini ug makabenipisyo usab kini kun aduna silay ipahigayong medical mission.
Si Leyson mipasangil ni Tiu nga nagbuhat og kaugalingong organisasyon ug sa last minute gidala niini ang mga kandidato sa administrasyon.
Si Leyson midungag nga ang tuyo niya sa paghangyo ni Tiu nga magkahiusa kini ug si Lanie tungod kay pareha kining daghang mga tigsuporta ug iyang nalantaw nga mahimong magmabungahon ang iyang pagdagan isip mayor sa Talisay.