Pagmaya ni Luigi sayo pa kaayo

Sayo pa alang sa kampo ni Provincial Board Member Gabriel Luis Quisumbing sa pagpangangkon sa kadaugan batok kang incumbent 6th District Representative Nerissa Soon-Ruiz sanglit nagpadayon pa man ang eskutinyo.

Giangkon sa kampo ni Quisumbing ang kadaugan sa miaging piniliay sa ilang kaugalingong eskutinyo nga giingong mokabat sa 4,000 botos ang labaw niini.

Hinuon sa C-CIMPEL nga pag-ihap sa mga balota maoy nagpakita nga milabaw si  Soon-Ruiz sa nahipos niining boto nga mokabat sa 72,153 botos.

Samtang si Quisumbing ang nakahipos lamang og mokabat sa 70,180 botos  sa mokabat usab sa 1,419 ka presinto nga ilang naeskutinyo sa kinatibuk-ang 2,317 ka presinto.

Si Kongresista Soon-Ruiz sa iyang pamahayag iyang giangkon nga napildi lamang kini sa lungsod sa Consolacion nga tungod sa kuwarta ang iyang kandidato alang sa pagka mayor ang kalit lang mibali sa iyang suporta kang Quisumbing.

Matud pa ni Soon-Ruiz nga midaug siya sa Cordova, dakbayan sa Lapulapu ug dakbayan sa Mandaue nga maoy hinungdan sa kasiguroan nga maangkon niya ang kadaugan.