Terorismo sa MV Butuan Bay 1 gisalikway sa Marina

Gisalikway sa mga imbistigador ang aspetong terorismo sa pag-ulbo sa engine room sa MV Butuan Bay 1 niadtong Martes nga namatyan og tulo ka tawo samtang 14 ang angol.

Kini samtang gilusad karon sa taga Maritime Industry Authority (MARINA) ang higpit nga pag-inspection sa duha pa ka laing barko sa Gothong Shipping Lines (GSL) aron kalikayan ang susama sa nahitabo sa MV Butuan Bay 1.

Matud pa ni Engr. Norman Marlon, imbestigador sa Marina dinhi sa Sugbu nga ang ilang central office sa Manila mipadala gyud og usa ka special investigator nga si Arnie Santiago.

Sa gihimong imbestigasyon ni Santiago sugod niadtong Miyerkules hangtod kagahapon Huwebes nasayran gikan kaniya nga dili bomba ang miulbo, kundi makina sa barko nga "mi-over heat" busa wa makamugnag sunog, lahi sa bombang moulbo nga ubanan sa bagang kayo busa daghan ang mamatay.

Ang finding ni Santiago susama ra usab sa obserbasyon sa mga kapolisan sa Cebu City ug Mandaue City kauban ang mga tinugyanan sa Scene of Crime Operations (SOCO), matud pa ni Mardon.

Nasayran gikan sa mga imbestigador sa Marina nga ang makiha sa barko dagko kaayo busa kon kini ma-over pressure gumikan sa sobrang kainit dili kalikayan mobuto o moulbo.

Apan matud pa ni Mardon nga panagsa ra kini mahitabo, apan basta aksidente, dili kalikayang mahitabo  gyud ni matud pa niya.

Gumikan niini gihigpitan karon sa taga Marina ug ubang mga kapolisan ang pag-inspection sa lain pang duha ka barko sa GSL nga mao ang MV Subic Bay ug MV Osamiz Bay aron kalikayan ang susamang nahitabo sa MV Butuan Bay 1. — Wen Celen