'Terorismo' gisunod sa pagbuto sa barko

Ang Scene of the Crime Operation (SOCO) ug Explosive Ordnance Disposal (EOD)   gitahasan sa pagkolekta og mga ebidensiya   sa nagpadahon  imbestigasyon  pagsota  sa hinungdan sa pagbuto sa M/V Butuan Bay 1 sa Gothong Lines niadtong Martes sa gabii diha sa Pier 7  dakbayan sa Mandaue.

Ang mga otoridad  wala mabasura  nga terismo ang  posibleng hinungdan sa  pagbuto sa barko.

Si Commodore Alejandro Flora, commander sa Philippine Coast Guard Central Eastern Visayas nagkanayon nga wala nila isalikway ang anggulo nga terorismo ang usa sa hinungdan sa hitabo ug tungod niini nangayo sila og technical nga suporta gikan sa SOCO ug EOD.

Matud ni Flora nga kun walay makita nga timailhan nga hinungdan sa explosive device ang maong pagbuto sa barko ilang ikonsiderar nga anggulo mao ang mechanical defect o dunay depekto sa makina ang barko.

Si   Chief Insp. Romer Daguno sa SOCO nagkanayon kagahapon nga nakahimo na sila og pakisusi sa barko kagahapon sa buntag ug buot nila nga masuhito ang ubang parte niini.

Matud ni Daguno nga sila ug ang tagdumala sa Gothong nagkasabot nga mopahigayon una og conference aron ilang mahibaw-an ang usa sa mga hinungdan nga mobuto ang makina.

Ang M/V Butuan Bay 1 mopaingon unta sa  Ozamiz diin sakay niini ang 513 ka pasahero ug tripulante apan mibuto ang makina sa maong barko mga 100 ka metros gikan sa nahisgutang pantalan sa Mactan channel.

Tulo ka tripulante sa barko ang namatay ug laing 15 ka pasahero ang angol sa maong pagbuto.

 Ang mga namatay giila nga sila si 2nd engineer Jimmy Manreal, apprentice engineer Clarito Tagalog ug Jefferson Esguerra, on job training (OJT).

Ang mga naangol mao si Chief Engineer Entecee Nicostrato, ug mga pasahero nga si Lumina Nicostrato 70, Rosa Molina,  67, kinsa gipangdala diha sa Cebu Doctor’s Hospital niining dakbayan.

Sila si Rodrigo Frejones,  60, Felnor Cabog 22, German Navarro 46, Maria Theresa Cabalan 33, Daniel Francisco 22 ug Chris Aring 56 ang gidala diha sa Chong Hua Hospital niini usab nga dakbayan.

Laing lima ka angol kinsa nakaangkon og mga paso sa lawas ang gidala diha sa Cebu City Medical Center nga sila si Marichelle Caballero 19, Julieto Malinao,  20, Aiza Defamante 17, Queenie Bacondador,  21 ug Wencell Claro, 19 apan adunay laing usa ka babaye nga biktima kinsa nakaangkon og 3rd degree burns sa lawas ang wala pa mailhi.

Kasagaran sa mga biktima mao ang mga pasahero nga nahimutang duol sa engine  room samtang ang tulo ka namatay ang diha sulod sa engine room misunod sa dihang nahitabo ang pagbuto.

Gikataho nga ang mga gamit ug mga teheras nga giokupahan sa mga pasahero  milugpad ug naabli usab ang puthaw nga pultahan sa engine room  ug  na ang krudo ug init nga asayte ngadto sa mga pasahero hinungdan nga nangapaso kini.

Si Elpidio Gunio, Cebu Coast Guard  Station Commander nagkanayon nga ang barko naglawig na taliwala sa pier 4 ug 7.

Ang mga rescuer kinsa sakay og tugboat   miabot pipila ka minuto ang milabay ug gihakot niini sa pag-una ang mga pasahero nga naangol balik sa pantalan diin naghuwat ang upat ka ambulansiya.

Laing duha ka tugboats ang miguyod sa barko nga mibuto balik sa pantalan.

Gibutyag ni Gunio nga mga ala 1:30 sa buntag na nila nakuha ang mga patay'ng lawas gikan sa barko tungod kay gipakanaog pa nila ang tanang mga pasahero.