Atty. Sitoy miangkon siyay miilog sa ER

Giangkon ni mayoralty candidate Adelino Sitoy sa Cordova ang insidente nga giingong “snatching” sa election returns sa Mayo 15 sa kaadlawon sa naasoy’ng lungsod.

Si Sitoy nagpatawag og press conference kagahapon sa buntag ug mipasabot nga siya ang miilog sa election returns, dili si incumbent Mayor Arleigh Sitoy nga iyang anak, sukwahi sa nahaunang report.

Matud pa ni Sitoy nga usa lang ka kopya ang iyang gikuha ug dili ang authenticated nga election returns. Giklaro niya nga ang authenticated nga kopya sa election returns iya sa Commission on Election.

Si Sitoy nagkanayon nga gihatagan siya og katungod ni congressional candidate Luigi Quisumbing nga makakuha ug makahupot og kopya sa election returns tungod kay ubos man siya sa One Cebu – Kampi party.

Gitataw sa abogado nga kandidato pagka-mayor sa maong lungsod nga adunay nabati nga sipang boto sa armas atol sa pagbawi niya sa election returns hinungdan nga migawas siya sa Toyota Prado nga iyang sakyanan ug misulod sa presinto sa kapolisan aron pagpangayo og tabang.

Katungod sa usa ka kandidato nga makahupot og kopya sa election returns, sumala pa ni Sitoy, busa angayan lang nga makaangkon siya og kopya niini.

Kahinumduman, migawas ang ngalan ni Mayor Arleigh Sitoy nga maoy miilog sa election returns gikan sa usa ka Victor Tago.