Gipatay tungod sa politika

Namatay diha sa tambalanan niadtong milabay''ng gabii ang usa ka 46 anyos nga kargador human kini bunal-bunali sa ulo sa tawong iyang gikalalis dihang iyang giingnan nga pildihon ang kandidato niini.

Ang namatay giilang si Jerry Suarez,46, residente sa sitio San Miguel barangay San Roque ning dakbayan apan diha na maghigdaan sa Carbon Market tungod sa trabaho niini.

Usa ka Rudy Ochea alyas "Rudy Praning" nga residente usab sa maong merkado ang gitumbok nga mipasipala sa biktima.

Sa imbestigasyon ni SPO2 Rey Cuyos sa Homicide Section base usab sa pamahayag sa kapuyo sa biktima nga si Norma Baron kasamtangang natulog ang biktima diha sa lantay diha sa sitio Barracks Warwick, Ermita sa may Carbon Market dihang gipuspusan makadaghang higayon sa suspek niadtong Martes sa hapon.

Ang biktima nakaangkon og grabeng kadaut sa lawas, bukton ug sa ulo tungod sa kahoy ug basiyo sa botelya nga gipuspos ni Ochea.

Nasayran nga ang biktima ug suspek uban sa ilang tagsa-tagsa ka mga higala nag-inom sa managlahing lamesa diha sa tindahang gipanag-iya sa igsuon sa suspek nga si Sitoy Ochea.

Gikatahong ang suspek naghisgut sa politika uban sa iyang mga higala ug sa kalit lang gikatahong miduol sa biktima ug misambat og estorya sa pag-ingon;" Dili na kadaog imo kandidato oy!"