Watchers sa GO di kabayran

Tulo ka adlaw na lang sa dili pa ang eleksyon karong adlaw''ng Lunes, apan hangtod karon wala pay kasiguroan kun mohatag ba og funding ang Genuine Opposition (GO) alang sa honorarium sa ilang mga political watchers dinhi sa dakbayan sa Sugbu atol sa adlaw sa piniliay.

Nasayran nga karong adlawa maoy kataposang adlaw nga gihatag nga tagal ni congressional candidate Jonathan Guardo ug kasamtangang chairman sa GO Cebu City Chapter pagpadala sa partido og gahin alang sa honorarium sa ilang mga watchers nga maoy magbantay sa ilang mga botos sulod sa presinto atol sa botasyon ug ngadto na sa pagkatapos sa canvassing.

Sa higayon nga walay gahin nga ihatag ang GO posibleng tinud-on ni Guardo ang bahad niini nga ilahang i-junk ang tanang kandidato sa GO pagka-senador ug papason nila kini diha sa ilang mga sample ballot nga giandam.

Una nang mitumaw ang gamay''ng panagsungi tali ni Guardo ug kang kanhi Senador Sonny Osmeña, kandidato pagka senador sa GO dihang nanaway ang kanhi senador sa gipasiugdahang political rally nila ni Guardo sa Punta Princesa niadtong Abril 25 nga gihulagway sa kanhi senador nga gamay ra ang mga tawong nanambong niini.

Nasayran nga ang mga watchers maoy magsilbeng representante sa lainlaing political party nga magbantay sa ipahigayong botasyon sulod sa presinto ug ngadto na sa ipahigayong canvassing.